Birləşmiş Millət Təşkilatının Təhlükəsizlik Şurasının ötən gün baş tutan iclasında Rusiya Böyük Britaniyaya xəbərdarlıq edib. Reuters İnformasiya Agentliyi xəbər verir ki, Rusiyanın BMT-dəki səfiri Vasil Nebenzia iclasda 30 dəqiqədən çox davam edən nitqində Britaniyanın Rusiya ilə bağlı iddialarından danışıb.
“Biz britaniyalı həmkarlarımıza dedik ki, siz odla oynayırsız və üzr istəyəcəksiz” – deyə səfir bildirib.
Böyük Britaniyanın BMT-dəki səfiri Karen Pirs isə bildirib ki, o, ölkəsinin addımlarının araşdırmalara əsaslandığına inanır:
“Bizim gizlədəcək heç nəyimiz yoxdur, amma görünür Rusiyanın qorxduğu nə isə var”.
Böyük Britaniyada keçmiş rus casusu Sergey Skripalın zəhərlənməsindən sonra iki ölkə arasında diplomatik münasibətlər gərginləşib. Casusun Rusiya tərəfindən kimyəvi silahla zəhərləndiyi iddia edilir. Bu hadisədən sonra Böyük Britaniya, eləcə də ona dəstək nümayiş etdirən digər Avropa ölkələri və Amerika öz ölkələrindən ümumilikdə 100-dən çox rus diplomatını qovub.
