Məntəqə sədri topa bülleten atan seçici haqda: Qoy bunları atsın, bir də atmayacaq

Hazırda davam növbədənkənar prezident seçkilərində jurnalistlər pozuntular qeydə alıb. Jurnalist Əli Zeynalın müşahidəsinə görə Yasamal rayon 15 saylı seçki dairəsinin 5, 6 və 7 saylı məntəqələrində seçicilər qutuya 3-4 bülleten atıb. Jurnlasist bildirib ki, həmin məntəqədə kamera olmadığından pozuntu etməkdən çəkinilmir.

Hüquq müdafiəçisi Rəsul Cəfərov isə Suraxanıda 84 saylı məktəbin qarşısında “karusel” əməliyyatı müşahidə etdiyini deyir. O ehtimal edir ki, bir qrup şəxsi qırmızı mikroavtobusla məntəqələri gəzdirərək “karusel” əməliyyatı təşkil olunur.

Jurnalist Ömər Məmmədovun məlumatına görə 54 saylı Siyəzən-Şabran seçki dairəsinin məntəqələrindən birində 10-a yaxın seçici seçki qutusuna topa bulleten atıb. Seçicilərdən birində topa bulleten gördüyünü sədrə deyən jurnalistə məntəqə sədri belə cavab verib: “Qoy bunları atsın, bir də atmayacaq”.

Məntəqələrdə qeydə alınan pozuntu halları ilə yanaşı bəzi yerlərdə MSK-nın quraşdırdığı kamerlarla müşahidə aparmaq mümkün deyil. Seçkinin başladığı ilk saatlar ərzində 15 saylı Yasamal seçki dairəsinin 25 saylı seçki məntəqəsindəki kamera görüntüsünü izləmək mümkün olmayıb. Bir müddət sonra kameranın fəaliyyəti bərpa edilib. Hazırda isə 77 saylı

Astara seçki dairəsinin 2 saylı məntəqəsində görüntünü müşahidə etmək olmur.

Bu gün saat 10-da Mərkəzi Seçki Komissiyası seçkilərin gedişatı ilə bağlı ilk açıqlamasını edib. APA xəbər verir ki, MSK Katibliyinin Seçkilər İnformasiya Mərkəzinin müdiri Fərid Orucov indiyə qədər 994 min 196 nəfər seçicinin, tyəni seçicilərin 18.71%-nin səs verdiyini açıqlayıb.