Alan Qarsiya. Foto: congreso.net

Perunun keçmiş prezidenti Alan Qarsiya özünü güllələyərək intihar edib.

Korrupsiya ittihamında adı hallanan eks-prezident onu həbs etmək üçün evinə gələn polislərə vəkilinə zəng edəcəyini deyib və otağına keçib. Bundan sonra o, başına güllə vurub. 69 yaşlı eks prezidentin ölüm xəbərini ölkənin hazırkı prezidenti Martin Vizkarra da təsdiqləyib.

Alan Qarsiya kim idi: Peşəkar natiq hesab olunan Alan Qarsiya uzun müddət ölkənin əsas siyasi partiyalarından olan Apra Partiyasının lideri olub. 1985-1990-cı illərdə Perunu millətçi kimi idarə edib. Daha sonra azad bazar iqtisadiyyatının dəstəkçisi kimi çıxış edən A.Qarsiya 2006-cı ildə ikinci dəfə prezident seçilib.

Adı hansı korrupsiya cinayətində hallanırdı: Keçmiş prezidentin adı Braziliyanın nüfuzlu inşaat şirkətlərindən olan Oderbrecht ilə əlaqələrinə görə cinayət işinə daxil edilmişdi. 2016-cı ildə aydın olub ki, bu şirkət regionda rüşvət yolu ilə şirkət üçün gəlirli hesab olunan müqavilələr imzalayıb. Bununla da Odebrecht Latın Amerikasının ən böyük korrupsiya qalmaqalını yaradıb.

Bu hadisədən sonra A.Qarsiya Uruqvay səfirliyinə sığınıb və mühacir statusu üçün müraciət edib. Amma 1 aydan sonra onun tələbi rədd edilib.

Ötən həftə ölkənin daha bir keçmiş prezidenti Pablo Pedro Kuzinski də Oderbrecht ilə birlikdə pul yumaqla bağlı aparılan istintaq çərçivəsində həbs olunub.

Şərhini yaz

Şərhinizi yazın
Adınızı daxil edin