Qırğızıstanın keçmiş prezidenti Almazbek Atambayev xüsusi təyinatlı qüvvələr tərəfindən həbs olunub. Azadlıq Radiosu yazır ki, onlar eks prezidentin yaşadığı şəhərdə əməliyyat keçirib. Jurnalist Mirbek Aitikeevin Facebook-dakı canlı yayımında A.Atambayevin maskalı şəxslər tərəfindən aparıldığı görünür. Əməliyyat zamanı atışma səsləri eşidilib, yaralılar var.
Nə baş verib: Keçmiş prezident A.Atambayevə qarşı 2011-2017-ci illərdə prezident olduğu dövrdə törətdiyi iddia olunan əməllərə görə 5 ittiham irəli sürülüb. O səlahiyyətlərindən sui-istifadədə, korrupsiyada və qanunsuz varlanmaqda ittiham olunur. Atambayev özünə qarşı bütün ittihamları rədd edir və bildirir ki, ittihamlar siyasi motivlidir. O indiyədək Daxili İşlər Nazirliyinin çağırışlarından imtina edib.
Qırğızıstan qanunlarına görə hüquq-mühafizə orqanlarının iki çağırışına cavab verməyən şəxs dindirmə üçün məcburi qaydada saxlana bilər.
Ötən may ayında Qırğızıstan qanunlarına edilən dəyişikliklər Atambayevi keçmiş prezident kimi toxunulmazlıqdan məhrum edib.
