Bu gün Ceyranbatan su anbarı yaxınlığında yanğın baş verib. Yanğınla bağlı baş verənləri toplamışıq!
Nə vaxt baş verib?
İyunun 11-də Ceyranbatan su anbarının yaxınlığında yanğın baş verib. Yanğın ərazidəki quru ot və kol-kosun yanmasından sonra başlayıb və bir neçə saat davam edib. Yanğını söndürmək üçün əraziyə müvafiq qüvvələr, o cümlədən Aviasiya dəstəsinin iki helikopteri cəlb olunub
Yanğın baş verən əraziyə kimlər gedib?
Fövqəladə Hallar nazirinin müavinləri Etibar Mirzəyev və Tapdıq Əmiraslanov, habelə nazirliyin digər vəzifəli şəxsləri həmin əraziyə gedib.
Yanğın nə vaxt söndürülüb?
FHN-nin məlumatına görə, yanğın saat 16:49-da söndürülüb. Yanğının söndürülməsi əməliyyatına cəlb edilib:
- Dövlət Yanğından Mühafizə Xidmətinin canlı qüvvəsi və 17 ədəd texnikası
- Aviasiya dəstəsinin 3 ədəd helikopteri
- Mülki müdafiə qoşunlarının və Xüsusi Riskli Xilasetmə Xidmətinin şəxsi heyəti
Ceyranbatan su anbarı nə vaxt və niyə yaradılıb?
Ceyranbatan su anbarı Bakı və Sumqayıt şəhərlərində içməli və texniki suya tələbatın kəskin artması ilə əlaqədar olaraq 1955-ci ildə yaradılıb. Bu anbar içməli su mənbəyi olduğuna görə, 1960-cı ildə onun ətrafında üç zolaqdan ibarət sanitar-mühafizə zonası yaradılıb.