Bu il nümayişi planlaşdırılan “Tenet” filminin çəkilişləri zamanı səhnələrdən birində Boeing-747 təyyarəsi partladılıb. Rejissor Kristofer Nolan bu barədə “Total film” jurnalına müsahibəsində danışıb və deyib ki, həmin səhnədə əsl təyyarəni partlatmağın daha effektiv olacağını düşünüb.
Mən bunu minyatürlər, qurğular və visual kombinasiyalar və qalan digər şeylər istifadə etməklə canlandırmağı planladım. Amma çəkiliş komandası Kaliforniyada, Viktorvildə məkan üçün axtarış edəndə köhnə təyyarələrin olduğu massiv tapdılar. Biz xərcləri hesablamağa başladıq. Aydın oldu ki, real ölçüdə əsl təyyarə istifadə etmək və bu hissəni əsl kamera qarşısında canlandırmaq, minyatür qurmaqdan və ya CGI-dan istifadə etməkdən daha yaxşıdır.
Eyni müsahibədə aktyor Robert Patinson da həmin səhnədən danışıb. Patinson deyir ki, belə səhnə çəkiləcəyi ağlına gəlməyib:
Bu, gülməli dərəcədə cəsur addımdır. Yadımdadır ki, çəkiliş zamanı düşünürdüm ki, bu, bir filmdə daha neçə dəfə baş verə bilər?
Aktyor deyir ki, filmin müxtəlif hissələrinin çəkilişləri üçün 500 nəfərlik heyət müxtəlif ölkələrə səyahət edib.
Film nə vaxt yayımlanacaq: 205 milyon dollar büdcəsi olan “Tenet” Kristofer Nolanın “The Dark Knight Rises” filmindən sonra ən bahalı ikinci filmidir. “Tenet”in iyulun 17-də kinoteatrlarda nümayiş olunacağı gözlənilir. Amma ehtimal edilir ki, koronavirus pandemiyasına görə tarix dəyişdirilə bilər.