Avropa İnsan Haqları Məhkəməsi (AİHM) Sülh və Demokratiya İnstitutunun rəhbəri, hüquq müdafiəçisi Leyla Yunus və onun həyat yoldaşı Arif Yunusa qarşı hüquq pozuntularını tanıyıb.
Qurumun rəsmi saytında qeyd olunan məlumata görə, bu barədə qərar iyulun 16-da açıqlanıb.
AİHM hansı pozuntuları tanıyıb: Leyla və Arif Yunusların Konvensiyanın 5, 6, 8, 13, 18-ci maddələri ilə qorunan hüquqlarının, həmçinin 1 saylı Protokolun 1-ci maddəsinin, 4 saylı Protokolun 2-ci maddəsinin pozuntusu tanınıb.
Nə qədər cərimə təyin edilib: Dəymiş mənəvi zərərə görə hökumət onların hər birinə 20.000 avro, məhkəmə xərclərinə görə 11.438 avro təzminat ödəməli olacaq.
Nə baş verib: Yunuslar 2014-cü ilin aprelində ölkədən çıxarkən Bakı aeroportunda saxlanılıblar. Onların ofisində və mənzilində axtarış aparılıb, bank hesablarına həbs qoyulub, həmin ilin iyul ayında isə həbs olunublar. L.Yunus 8,5, A.Yunus 8 il azadlıqdan məhrumetmə cəzasına məhkum edilib.
2015-ci ildə onların hər ikisi məhkəmə zalından şərti azadlığa buraxılıblar və hazırda Hollandiyada yaşayırlar.
