15 gündür ki, aclıq aksiyası keçirən siyasi məhbus Emin Saqıyev Ombudsman Aparatından ona verilən sözün yerinə yetirilmədiyini deyir. Siyasi məhbusun ailə üzvləri Mikroskop-a bildirib ki, aparatın İşgəncələrin qarşısının alınması şöbəsinin müdiri Rəşid Rumzadə bir neçə gün əvvəl E.Saqıyevlə əlaqə saxlayıb onunla görüşəcəyinə və şikayətlərini dinləyəcəyinə söz verib. Artıq 4 gün keçsə də görüş hələ də baş tutmayıb.
Məhbusun ailəsi deyir ki, aclıq aksiyası 15 gündür davam etdiyinə görə onun vəziyyəti yaxşı deyil və özünü halsız hiss edir.
Onun üçün çağırılan həkim isə deyib ki, aclığı dayandırmasa müayinə etməyəcək və ona dərman yazmayacaq”.
Niyə aclıq aksiyası keçirir: Avqustun 17-də Ali Məhkəmənin onun şikayəti ilə bağlı keçirilən məhkəməsində Emin Saqiyev barədə əvvəlki hökm qüvvədə saxlanılıb. Buna etiraz olaraq siyasi məhbus aclıq aksiyası keçirməyə başlayıb.
Nə baş verib: Emin Saqiyev 2017-ci ilin noyabrında saxlanılıb və ona Cinayət Məcəlləsinin 234.4-cü, narkotik vasitələrin külli miqdarda satışı maddəsi ilə cinayət işi açılıb. 2018-ci il oktyabrın 3-də o, Bakı Ağır Cinayətlər Məhkəməsinin hökmü ilə 7 il müddətinə azadlıqdan məhrum edilib.
Emin Saqiyev kimdir: Emin Saqiyev mühacirətdə olan jurnalist Türkel Azərtürkün bacanağıdır. Hüquq müdafiə təşkilatları onun qohumu Türkel Azərtürkün fəaliyyətinə görə həbs olunduğunu düşünür. Emin Saqiyev siyasi girov hesab olunur.
