27 mayda Azərbaycan Müdafiə Nazirliyi (MN) 6 erməni hərbçisinin Azərbaycan ərazisinə keçərək orada minalanma işləri apardığı və onların saxlanıldığı ilə bağlı məlumat yayıb.
Məlumatda bildirilib ki, hadisə Kəlbəcər rayonunun Yuxarı Ayrım kəndi istiqamətində təminat yolunda baş verib.
Hadisənin təfərrüatları ilə bağlı hər iki tərəf fərqli rəsmi açıqlamalar verib və bir-birlərini ittiham ediblər.
Azərbaycan tərəfi:
Müdafiə Nazirliyinin mətbuat katibi Anar Eyvazov deyib ki, Ermənistan tərəfi diversiya qruplarının törətdiyi təxribatları ört-basdır etmək məqsədilə yalan məlumat yayıb:
Sərhədimizi keçərək ərazimiz daxilində mina işlərini aparmağa və təxribat əməllərini törətməyə cəhd göstərən diversiya qrupunu ermənilər guya mühəndis-istehkamçılar kimi qələmə verir. Əgər elədirsə, o zaman erməni hərbi mühəndisləri Azərbaycan ərazisində nə kimi mühəndis işləri görə bilər?
O həmçinin kiçik qruplarla mühəndis işləri həyata keçirilmədiyini vurğulayıb:
Onların məqsədi sərhəddə xidmət edən qüvvələrimizin arxasına keçərək təminat yolunu minalamaq olmuşdur. Belə ki, təminat yolundan istifadə edən qüvvələr minaya düşsünlər və şəxsi heyət arasında itkilər olsun
Xarici İşlər Nazirliyi saxlanılan erməni hərbçilərin Azərbaycan ərazilərində kəşfiyyat-diversiya əməliyyatları və yolların minalanmasına yönəlmiş təxribat terror fəaliyyəti həyata keçirməyə cəhd göstərdiyini deyib:
Ermənistan silahlı qüvvələrinin kəşfiyyat qrupunun Azərbaycan ərazisinə keçməsi və ərazini minalama və digər diversiya cəhdləri terror-təxribat əməli kimi qiymətləndirilir
Ermənistan tərəfi:
Ermənistan Müdafiə Nazirliyi bildirib ki, Azərbaycan Müdafiə Nazirliyinin əsir götürülmüş erməni hərbçilərinin Azərbaycan ərazisində olması haqqında məlumatı həqiqətə uyğun deyil:
Əsir götürülən hərbçilərin qaytarılması üçün lazımi tədbirlər görülür
Xarici İşlər Nazirliyinin bəyanatında deyilir ki, Azərbaycan silahlı qüvvələrinin bu hərəkətlərinin məqsədi vəziyyəti daha da gərginləşdirmək və regionda sülhə və təhlükəsizliyə ciddi təhlükə yaratmaqdır:
Biz Azərbaycan tərəfindən Ermənistanın ərazi bütövlüyü və suverenliyinə qarşı güc tətbiq edilməsini qətiyyətlə pisləyirik və qeyd edirik ki, Azərbaycan Silahlı Qüvvələri hərəkətləri və bunun nəticələri üçün məsuliyyət Azərbaycan hərbi-siyasi rəhbərliyinin üzərinə düşür. Əsir götürülən Ermənistan hərbçiləri dərhal və qeyd-şərtsiz qaytarılmalıdır
Ermənistan Baş naziri vəzifəsini icra edən Nikol Paşinyan isə deyib ki, bu, Ermənistan Respublikasının suverenliyinə birbaşa təhdiddir və məsələni həll etmək üçün bütün beynəlxalq vasitələrdən istifadə etmək lazımdır.
Onun sözlərinə görə, hərbçilər sərhəddə təhlükəsizlik səviyyəsinin artırılması məqsədilə, xəbərdarlıq nişanları qoyaraq sərhədi minaladıqları zaman oğurlanıb.
Baş nazirin fikrincə, Azərbaycan tərəfinin məqsədi hərbi konflikt qızışdırmaqdır, lakin erməni tərəfi bu cəhdlərə təslim olmamalıdır.
Nə baş verib: Son 3 gündür ki, Azərbaycan və Ermənistan bir-birini Kəlbəcər-Gədəbəy-Geğarkunik sərhədləri yaxınlığında atəşkəsi pozmaqda ittiham edib.
