Sentyabrın 21-də “Azərxalça” Açıq Səhmdar Cəmiyyətinin İdarə heyətinin sabiq sədri Vidadi Muradovun qanunsuz əməllərinə görə Baş prokuror yanında Korrupsiyaya qarşı Mübarizə Baş İdarəsində başlanmış cinayət işinin istintaqı yekunlaşdırılıb.
İstintaq zamanı aşkara çıxan qanunsuzluqlar
Vidadi Muradovun qeyd olunan vəzifədə işləyərkən təsisçisi olmaqla faktiki rəhbərlik dövrdə
- “Azər-İlmə” MMC-nin Bakı şəhəri ərazisində yerləşən inzibati binasının “Azərxalça” ASC-yə mövcud bazar qiymətlərindən yüksək qiymətə icarəyə verilməsi,
- “Azərxalça” ASC-yə məxsus pul vəsaitinin xalça istehsalı üçün nəzərdə tutulan ipin alınması üçün formal müqavilənin bağlanması yolu ilə ayrı-ayrı hüquqi şəxslərə məxsus bank hesablarına köçürülərək sonradan nağdlaşdırılması,
- ölkə ərazisində tikintisi həyata keçirilmiş 23 müəssisə üzrə smeta sənədlərində iş həcmlərinin və qiymətlərin əsassız olaraq şişirdilməsi,
- işlərin daha ucuz və keyfiyyətsiz işlərlə əvəz edilməsi və ya yerinə yetirilməməsi aşkarlanıb.
Mənimsəmə halları
İstintaq zamanı ümumilikdə 21 milyon 673 min manat məbləğində pul vəsaitini mənimsəmə və israf etmə yolu ilə talaması, 640 min manat məbləğində vergiləri dövlət büdcəsinə ödəməkdən qəsdən yayınması, vəzifə səlahiyyətlərindən sui-istifadə etməsi və vəzifə saxtakarlığına yol verməsinə şübhələr müəyyən edilib.
İttiham olunduğu maddələr
Vidadi Muradova Cinayət Məcəlləsinin bu maddələri ilə ittiham edilir:
- mənimsəmə və ya israf etmə- xüsusilə külli miqdarda ziyan vurmaqla törədildikdə,
- vergiləri ödəməkdən yayınma- xüsusilə külli miqdarda törədildikdə,
- vəzifə səlahiyyətlərindən sui-istifadə etmə- ağır nəticələrə səbəb olduqda
- vəzifə saxtakarlığı
30 milyon manatlıq əmlak
İstintaq zamanı dövlətə dəymiş ziyanın ödənilməsi məqsədilə təqsirləndirilən şəxs Vidadi Muradov və onun ailə üzvlərinin adlarına olan ümumi dəyəri 30 milyon 587 min manat təşkil edən yaşayış və qeyri-yaşayış sahələri, habelə “Azər-İlmə” MMC-nin səhm paylarının və aktivlərinin üzərinə məhkəmə qərarı ilə həbs qoyulub. Məhkəmənin qərarı ilə onun barəsində həbs qətimkan tədbiri seçilib. Cinayət işinə baxılması üçün Bakı Ağır Cinayətlər Məhkəməsinə göndərilib.
