Oktyabrın 11-də Bakı Apellyasiya Məhkəməsində Mədəniyyət nazirinin keçmiş müavini Rafiq Bayramova verilmiş 8 illik həbs cəzası azaldılıb.
Ümumilikdə 1 milyon 800 min manata yaxın rüşvət almaqda adı hallanan Rafiq Bayramov özünü təqsirli hesab etmir.
R.Bayramovun nazirliyin tabeliyində olan müəssisələrin rəhbərlərindən aylıq rüşvət aldığı iddia olunurdu.
Bakı Apellyasiya Məhkəməsi onun uzun illər yüksək dövlət vəzifələrində çalışmasını, həbsindən sonra 1.2 milyon manat vəsaitin dövlət nəfinə köçürülməsini nəzərə alaraq, ona Cinayət Məcəlləsinin 62-ci (Cinayətə görə müəyyən edilmiş cəzadan daha yüngül cəza təyin edilməsi) maddəsini tətbiq edib. Qərara əsasən 8 illik həbs cəzasının müddəti 4 il 6 aya endirilib.
R. Bayramov deyib ki, nazir müavini olsa da, həmin işlərin onun razılığıyla görülməsi mümkün deyildi.
12 ay istintaq bu ittihamla getdi, amma sübuta yetirilmədi. Sonra rüşvət maddəsi ilə ittiham verildi. Mən ömürboyu rüşvət almamışam. Bu, heç cür mümkün deyil. Bir nəfər də burada demədi ki, mən onlardan və ya başqasından rüşvət almışam.
O, avqustdakı məhkəməsində son sözündə deyib ki, heç bir zaman korrupsiyaya bulaşmayıb:
Mən ömrüm boyu Əliyevçi olmuşam, dövlətimə xidmət etmişəm. Səhvlərim olub və bu da mənim təcrübəsizliyimdən, gəncliyimdən olub. Amma heç bir zaman korrupsiyaya bulaşmamışam. O insana cəza verilir ki, əməlindən islah olunsun. Mən rüşvət almamışam, nədən islah olunacam?
Nə baş verib: 2020-ci ilin mayında Dövlət Təhlükəsizliyi Xidməti (DTX) əməkdaşları tərəfindən R.Bayramov, eləcə də nazirliyin tabeliyində olan Mədəni İrsin Qorunması, İnkişafı və Bərpası üzrə Dövlət Xidmətinin keçmiş rəisi Zakir Sultanov həbs edilib.
