Azərbaycan Xalq Cəbhəsi Partiyasının (AXCP) üzvü Elxan Əliyevin oktyabrın 16-da inzibati qaydada həbs olunduğu bildirilir. Partiyadan verilən məlumata görə, E.Əliyev ilə oktyabrın 15-dən yoxa çıxıb və bir gün sonra məlum olub ki, o, Xətai rayon 37-ci polis bölməsindədir.
Nədə ittiham olunur: Onun Barəsində İnzibati Xətalar Məcəlləsinin 535-ci (polisə müqavimət) maddəsi ilə protokol tərtib edilib. Fəala Xətai rayon Məhkəməsinin qərarı ilə 20 sutka inzibati həbs cəzası verilib.
AXCP nə deyir: Azərbaycan Xalq Cəbhəsi Partiyasının sədri Əli Kərimli deyib ki, ölkə rəhbərliyinin ittiham olunduğu korrupsiya ifşa olunduqca repressiya güclənir:
Dünyanın müxtəlif bölgələrində Əliyevlərin milyardlıq mülkləri aşkarlanır, korrupsiyaları ifşa olunduqca üstəlik repressiyanı gücləndirirlər. Rejim elə bilir ki, mübarizənin önündə gedən cəsur insanları həbs etməklə digərlərini də qorxuda biləcək. Xalqımız həm qiymət artımına, həm də qanunsuz həbslərə, işgəncələrə hamılıqla etiraz etməlidir. Rejimə sübut etməlidir ki, təkcə minlərlə ictimai-siyasi fəal yox, hamımız azadlıq, ədalət, rifah istəyirik.
Əli Kərimli
Nə baş verib: Hazırda təxminən 10-a yaxın AXCP fəalı inzibati qaydada həbsdədir. Partiya onların həbsinin fəalların siyasi fəaliyyəti ilə bağlı olduğunu deyir.
