Feminist aktivist Sənay Yağmura cinsi zorakılıq törətdiyi iddia edilən Əsgər Ağazadə oktyabrın 19-da şübhəli şəxs qismində saxlanılıb.
Bu barədə zərərçəkənin anası Zümrüd Yağmur “Facebook” səhifəsində məlumat verib.
Əsgər Ağazadə Yusif oğlu şübhəli şəxs qismində saxlanılıb. Dəstək olan hər kəsə təşəkkür edirəm.
Zümrüd Yağmur
Oktyabrın 13-də yazıçı Zümrüd Yağmur mətbuat konfransı keçirib. O, qızı Sənay Yağmurun 1 il əvvəl cinsi zorakılığa məruz qaldığını və bunu edən şəxsin bacısı oğlu Əsgər Ağayev olduğunu deyib.
Zərərçəkən Sənay Yağmur da “Facebook” hesabından məlumat yayıb ki, hadisəni Ə.Ağayevin törətməsi ilə bağlı sübutlar olduğu halda, 1 ildir ki, o, həbs edilməyib. Bir il ərzində Yasamal Rayon Prokurorluğunda hadisə ilə bağlı cinayət işinə iki dəfə xitam verilib. Səbəb kimi isə kifayət qədər sübut olmadığı əsas gətirilib.
Dövlət qurumları nə deyib: Oktyabrın 18-də isə Baş Prokurorluq məlumat yayıb ki, Cinayət Məcəlləsinin 149.2.3 (təqsirkar şəxs üçün aşkar surətdə yetkinlik yaşına çatmayan şəxsə qarşı törədildikdə) maddəsi ilə Yasamal Rayon Prokurorluğunda başlanan cinayət işini Baş Prokurorluq nəzarətə götürüb. İstintaqın davam etdirilməsi Baş Prokurorluğun İstintaq idarəsinə həvalə edilib.
Reaksiyalar necə olub: Zorakılıq hadisəsinin düzgün araşdırılmasını tələb edən ictimai fəallar imza kampaniyası başladıb. “Qadın üçün” platformasının başlatdığı kampaniyaya qoşulmaq istəyənlər ad, soyad və ata adını rəy bölməsinə yaza bilər. Bununla yanaşı, müxtəlif sosial şəbəkələrdə #CinayətkarıHəbsEt, #ProkurorluğaArOlsun, #ŞəxsiOlanSiyasidir həştəqləri ilə hadisənin ədalətli araşdırılmasını tələb edən postlar paylaşılıb.
