9 aydır həbsdə olan iqtisadçı professor Qubad İbadoğlunun səhhəti hər gün daha da pisləşir.
İndi onun ayağının amputasiya edilmə təhlükəsi yaranıb.
Qızı Jalə Bayramova atası ilə bağlı sosial mediadakı paylaşımında onun hazırda əziyyət çəkdiyi xəstəlikləri sıralayıb və təcili tədbirlər görülməsini tələb edib.
Qubad İbadoğlu indi necədir: İqtisadçının qan şəkəri düşmür və nəticədə ayaq dırnaqlarında qaralmalar var və sol ayağında bir barmağında dırnaq bütövlüklə ətdən ayrılmaq üzrədir.
Həbsxana şəraitində o, yaraya qulluq edə bilmir və əgər yara çirk verərsə, onun barmağı və ayağı amputasiya edilə bilər.
İqtisadçı professorun əllərində, xüsusilə ayaqlarında periferik sinirlərin zədələnməsi (polineyropatiya) baş verib və hamısı yüksək şəkərin fəsadlarıdır.
Yüksək şəkər Q.İbadoğlunun görmə qabiliyyətində də problemlər yaradıb, onun yaxın və uzaq görməsi kəskin zəifləyib. Gözlərinin önündə torlar əmələ gəlib.
Həkimlər nə edir: Heç nə. Ailəsi 10 gündən artıqdır ki, bu barədə Bakı İstintaq Təcridxanasının Tibbi-Sanitar Hissəsinə məlumat versə də, heç bir tədbir görülmür.
Qubad İbadoğlu nə vaxt və niyə saxlanılıb: Azərbaycan Demokratiya və Rifah Partiyasının sədri, iqtisadçı Qubad İbadoğlu 23 iyulda saxlanılıb. Onun barəsində Cinayət Məcəlləsinin 204.1-ci – satış məqsədi ilə saxta pul, qiymətli dövlət kağızları əldə etmə və ya satma – maddəsi ilə cinayət işi başlanıb.
Qubad İbadoğlu öz həbsi barədə qısa şərh verə bilib: “İlham Əliyevin sifarişi ilə saxlanılmışam”.
Həbslə bağlı Azərbaycan Daxili İşlər Nazirliyinin yaydığı rəsmi məlumata görə, əməliyyat Türkiyə Daxili İşlər Nazirliyindən daxil olan məlumat əsasında keçirilib.
