Dövlət Turizm Agentliyi Azərbaycanın yeni turizm brendi, onun loqo və şüarını təqdim edib. “Land of fire Azerbaijan” brendindən isə imtina edilir və yeni loqo “Azərbaycan” sözünün ilk hərfi olan “a” hərfindən ibarət olacaq. Brendin yeni şüari isə belədir: “Yenidən fərqli baxışla bax” (“Take another look” – ing.)
“Landor” brendinq şirkətinin hazırladığı yeni loqo 5 ay ərzində ərsəyə gəlib. Brendin dünya ictimaiyyətinə təqdimatı isə bu ilin noyabrında Londonda keçiriləcək “Dünya Səyahət Bazarı” (London WTM) sərgisində baş tutacaq.
Bu günə qədərki turizm brendi “Land of fire” haqqında
2012-ci ildə Azərbaycanda baş tutan “Eurovision-2012” mahnı müsabiqəsində də bu brendin əsasında yaradılan “Öz alovunu yandır” şüarı istifadə olunub.
İspaniyanın “Atletiko Madrid” futbol klubu ilə bu loqodan istifadə üçün 2013-cü ildə 12 milyon avroluq müqavilə imzalanıb. Müqaviləyə əsasən 1 mövsüm ərzində idmançıların geyindiyi köynəyin üzərində “land of fire Azerbaijan” sözləri yazılıb.
2014-cü ildə isə eyni şüar İngiltərənin “Sheffield Wednesday” və Fransanın “Lens” futbol klublarının idmançılarının geyimində peyda olub. Bu, azərbaycanlı biznesmen Hafiz Məmmədovun o klubları almasından sonra baş tutub.
https://www.facebook.com/tourismboard.az/videos/1405877399546209/UzpfSTEwMDAwMzg5NzU2MzY0NjoxMjM0OTYzNTA5OTc2ODg5/
Yeni brend barədə yerli dizayner nə düşünür?
Dizayner Rəsul Həsənovdan xahiş etdik ki, yeni loqonun nə qədər uğurlu olub-olmadığını bizə izah etsin
Dizayner deyir ki, turizm loqosunun yenilənməsi ümumilikdə yaxşı haldır və buna ehtiyac var idi. Həmçinin ümumi brend strategtiyası mövcud deyildi:
“Lakin yenilənmiş brend dizaynı məni heç qane etmədi. İstər sloqan olaraq, istərsə də vizual olaraq bunun Azərbaycan üçün bir mahiyyət, ideya daşımadığını düşünürəm. Həmçinin rəng seçimi belə uğursuzdur. Bənövşəyi rəng Azərbaycana sonradan yeridilən rəngdir, bu bizim ümumi milli koloriyə uyğun deyil. Rəng palitralarını biz açıq-aydın xalçalarımızda görə bilərik, burada isə daha çox narıncı, qırmızı və yaşıl rənglər üstünlük təşkil edir”.
Rəsul Həsənov həm də onu deyir ki, simvol da xüsusilik daşımır və bir ölkə brendi üçün zəifdir:
“Bundan başqa yenə də brendinqin xarici şirkətə tapşırılması məni çox məyus etdi. Hazırda ölkədə yetəri qədər peşəkar dizayn şirkəti və dizaynerlər mövcuddur. Belə böyük layihələr artıq yerli şirkətlərə tapşırılmalıdır”.
