Şəhid ailələri niyə birdəfəlik müavinəti ala bilmir? İzah edirik!

Yaxınları 90-cı illərdə şəhid olan ailələr dəfələrlə Milli Məclis və Prezident Administrasiyası qarşısında aksiya keçiriblər. Səbəb də yaxınlarına 11 min manat məbləğində birdəfəlik müavinətin verilməməsidir.

Övladı şəhid olduğu üçün ona çatacaq 11 min manat sığorta pulunu ala bilməyən ana PA önündə. Foto: Ramin Deko

Nə baş verir: Prezident İlham Əliyev 2018-ci il aprelin 19-da fərman imzalayıb ki, müavinət 1997-ci il avqustun 2-dək ərazi bütövlüyü uğrunda həlak olmuş, ölmüş və hərbi əməliyyatlarla əlaqədar xəbərsiz itkin düşdüyünə görə ölmüş elan edilmiş hərbi qulluqçuların vərəsələrinə verilir. Qərarın icrasına isə Əmək və Əhalisinin Sosial Müdafiəsi Nazirliyi oktaybrın əvvəlindən başlayıb.

Şəhid yaxınları niyə müavinəti ala bilmir: Əmək və Əhalinin Sosial Müdafiəsi Nazirliyindən ailələrə deyilir ki, onların bir qisminə sığorta pulu artıq 90-cı illərdə verilib. Şəhid ailələri isə bu pulun verildiyinə dair hər hansısa qəbzin və ya sənədin olmadığını, o pulu almadıqlarını deyirlər.
Şəhid ailələrinin bir qismi həm də deyir ki, dövlət qurumları birdəfəlik müavinəti ödədiklərini dedikləri ailə üzvü şəhid olan şəxsdən də qabaq dünyasını dəyişib. Əsas gətirilən digər səbəb də sığorta idarəsinin arxivinin yanmağıdır.

Şəhid ailələri yenidən, dördüncü dəfə qanpuluna görə aksiya edirlər.

Posted by Meydan Tv on Monday, November 5, 2018

Əslində vəziyyət necədir: Siyasətçi Rəsul Mürsəlovdan xahiş etdik ki, şəhid ailələrinin müavinəti ala bilməməyinin əslində nədən qaynaqlandığını bizə izah etsin.

R.Mürsəlov deyir ki, bu məsələyə həm korrupsiya, həm də dövlət strukturunun düzgün işləməməsi baxımından yanaşmaq olar:

“Əgər həqiqətən arxiv yanıbsa, bu, biabırçılıqdır və maraqlıdır ki, indiyə qədər niyə bu, ictimaiyyətə açıqlanmayıb və bunun necə və niyə baş verdiyi barədə məlumat verilməyib. Bunların heç biri baş verməyib, deməli bu halın olmasını istisna edirik. Bu, dövlət məmurunun yalan danışmasıdır. Üstəgəl arxiv həqiqətən yanıbsa, dövlət bunu sübut etməlidir. Ola bilər ki, vətəndaş pul aldığı halda yenidən iddia etsin ki, o pulu almayıb. Bu halda dövlət sübut edə bilmirsə, yenidən o müavinəti ödəməlidir”.

Siyasətçini həm də o maraqlandırır ki, əgər bəzi ailələrə müavinət artıq 90-cı illərdə verilibsə, onda niyə prezident indi yenidən fərman imzalayır?

“Digər tərəfdən Azərbaycan 25 ildir müharibə şəraitindədir və daima şəhidlər olub. Niyə görə prezident hələ indi fərman imzalayır. Əgər 20 il əvvəl belə qanun var idisə, pullar verilirdisə, onda niyə president 2018-ci ildə bu barədə fərman imzalayır? Digər tərəfdən bu, şəhid ailələrinə dövlətin qayğısının olmamasının göstəricisidir. Bu həm də mesajdır ki, ailələr övladlarını dövlətin ərazi bütövlüyünü qorumaqdan çəkindirsinlər, çünki dövlət heç bir halda öz vətəndaşının arxasında durmur”.