30 sutka inzibati həbs edilən AXCP Salyan şöbəsinin fəalı Əlizamin Salayevin 8-ci polis bölməsində işgəncəyə məruz qaldığı deyilir. Bu barədə məlumatı partiyanın sədri Əli Kərimli facebook hesabından yazıb.
Hansı məlumatlar var: Əli Kərimli yazır ki, döyülmənin həddinə görə hətta Binəqdi Müvəqqəti Saxlama Təcridxanasında partiya fəalını qəbul etməyiblər. Xəstəxanada həkimlər fəalın əməliyyat edilməli olduğunu bildirsə də polis buna imkan verməyib və deyib ki, ilkin tibbi yardım göstərilsə kifayətdir.
Əlizamin Salayevin də döyülərkən videoya çəkildiyi deyilir.
Nə baş verib: Partiya fəalı yanvarın 13-də İnzibati Xətalar Məcəlləsinin 535.1 – polisin qanuni tələblərinə qəsdən tabe olmamaq ittiham ilə 30 sutka inzibati həbs edilib.
Hansı hadisədən sonra saxlanılıb: Əlizamin Salayev Salyanda polis kapitanı Həmzə Əzizovun 21 yaşlı qızı zorladığını idda edərək həmin polisi videoya çəkib və niyə məsuliyyətə cəlb edilməyini soruşub. Video facebook-da paylaşılandan bir neçə gün sonra AXCP fəalı Bakıda saxlanılıb.
