Xırdalan şəhəri Nizami küçəsində yeni təmir edilən yol çöküb. Bu barədə Mikroskop-a ərazidə yaşayanlar məlumat verib. AAYDA-nın açıqladığı rəsmi məlumata görə, həmin küçədə təmir 2020-ci il yanvarın 22-də yekunlaşıb.
Təmirlə bağlı nələri bilirik:
Ərazidəki təmir işlərinə Abşeron rayonunun icra başçısı İradə Gülməmmədova nəzarət edib.
Xırdalanın həm Nizami küçəsi, həm də digər bir neçə küçədəki təmir prezidentin sərəncamlarına əsasən aparılıb.
Söhbət hansı sərəncamlardan gedir:
İlham Əliyev Xırdalan şəhərində yolların təmir olunmağı ilə bağlı 2019-cu ilin noyabr və dekabr aylarında iki sərəncam imzalayıb.
Noyabrın 27-i imzaladığı sərəncamda AAYDA-ya 3,9 milyon manat ayırıb.
Dekabrın 16-da isə növbəti dəfə “Xırdalan şəhərindəki avtomobil yollarının əsaslı təmiri ilə bağlı əlavə tədbirlər haqqında” sərəncam imzalayıb və dövlət büdcəsindən daha 3 milyon manat vəsait ayrılıb.