Avropa İnsan Haqları Məhkəməsi keçmiş siyasi məhbuslar Qiyas İbrahimov və Bayram Məmmədovun Azərbaycandan göndərilən 6 şikayəti üzrə qərarını açıqlayıb. Qurumun fevralın 13-də elan etdiyi qərara görə, Azərbaycan hökuməti cərimələnib.
Şikayət nədir: Gənclər Avropa Məhkəməsinə saxlanma və həbs müddətindən üzləşdikləri hallardan şikayət göndərib;
- Saxlanılma zamanı işgəncə
- Qeyri-insani rəftara məruz qalma
- Axtarış və götürmənin qanunsuzluğu
- Məhkəməyə qədər həbsin qanunsuzluğu
İddia nədir: “Heykəl məhbusu” kimi tanınan gənclər AİHM-ə göndərdikləri şikayətlərdə iddia edirlər ki, onların işgəncəyə məruz qalmamaq, azadlıq və toxunulmazlıq, ədalətli məhkəmə araşdırması, şəxsi həyatın toxunulmazlığı, ifadə azadlığı hüquqları pozulub. Məhkəmədən həmçinin 5-ci, 8-ci və 10-cu maddələrlə birlikdə götürülməklə 18-ci maddənin pozuntusunun tanınmasını tələb edirdilər.
AİHM nə deyir: Məhkəmə hesab edib ki, gənclərin 3-cü, 5-ci, 10-cu və 18-ci (5-lə birgə) maddələrlə təminat altına alınan hüquqları pozulub. Hökumət gənclərə birlikdə 72 min avro təzminat ödəməlidir.
Bayram və Qiyas kimdir: Bayram Məmmədov və Qiyas İbrahimov 2016-cı il mayın 10-da keçmiş prezident Heydər Əliyevin heykəlinə “Qul bayramınız mübarək” və “Fuck the system” sözləri yazdıqdan sonra həbs olunub. Rəsmi açıqlamada deyilirdi ki, Bayram Məmmədovdan 2.904 qram, onun evindən isə 1 kiloqram 150 qram heroin aşkar edilib. Qiyas İbrahimovdan 2.607 qram, onun yaşadığı evdən isə 1 kiloqram 10 qram heroin tapılıb.
Hansı hökm oxunub: Bakı Ağır Cinayətlər Məhkəməsi 2016-cı il oktyabrın 25-i Qiyas İbrahimovu, həmin il dekabrın 8-də isə Bayram Məmmədovu 10 il azadlıqdan məhrum edib.
Gənclər 2019-cu ilin martında İlham Əliyevin imzaladığı əfv sərəncamı ilə azadlığa çıxıblar.
