Mərkəzi Seçki Komissiyasının (MSK) bu gün keçirilən iclasında parlament seçkilərində qalib elan olunan Erkin Qədirlinin şikayətinə baxılıb. 16 saylı Yasamal üçüncü seçki dairəsindən namizəd olan E.Qədirli seçki günü 1, 4, 11, 13, 21, 27, 28 və 29 məntəqələrdə pozuntu olduğunu bildirib.
Report yazır ki, MSK katibi Arifə Muxtarova şikayətlə bağlı araşdırma aparıldığını və heç bir məntəqədə pozuntu aşkarlanmadığını bildirib.
Qurum qərar verib ki, Erkin Qədirlinin müraciəti təmin edilməsin və DSK-nın qərarı qüvvədə qalsın.
Nə baş verib: Fevralın 9-u Azərbaycanda Milli Məclisə seçkilər keçirilib. Bu seçkilərdə 16 saylı Yasamal üçüncü seçki dairəsindən REAL partiyasının üzvü Erkin Qədirli namizədliyini irəli sürüb. MSK-nın açıqladığı ilkin nəticələrdə o, həmin dairə üzrə ən çox səs toplayan namizəd olub. Seçkilərin nəticələri ilə bağlı brifinqində E.Qədirli bildirib ki, dairədə pozuntular qeydə alınıb və o, bununla bağlı MSK-ya şikayət edəcək.
Pozuntular nələr idi: Seçki nəticələri ilə bağlı protokollarda Erkin Qədirlinin xeyrinə əlavə səslər yazılıb. Lider namizəd bunun dairədəki ümumi seçici fəallığını artırmaq üçün edildiyini deyib.
