Amerika Birləşmiş Ştatları prezidenti Donald Tramp bu gün koronavirusla bağlı əhaliyə müraciət edib. Canlı yayımlanan müraciətdə prezident Avropadan ABŞ-a səfərlərin 30 gün müddətinə dayandırıldığını bəyan edib. O deyib ki, bu qadağa yalnız Böyük Britaniyaya və müayinədən keçən amerikalılara şamil edilməyəcək.
Nə baş verib: Hazırda ABŞ-da koronavirusa yoluxanların sayı 1000-dən çoxdur. Testlərin ləngiməsinə görə ehtimal edilir ki, yoluxmalar rəsmi təsdiqlənəndən daha çoxdur.
- Ümumdünya Səhiyyət Təşkilatı da martın 11-i koronavirusu pandemiya elan edib.
Azərbaycanda vəziyyət necədir: İrandan Azərbaycana gələn bir neçə nəfərdə virus aşkarlandıqdan sonra yoluxanların sayı artıb. Son rəsmi məlumatlara görə, hazırda yoluxanların ümumi sayı 11 nəfərdir.
- Virusa görə Azərbaycanda bütün təhsil müəssisələrində tədris dayandırılıb. Kütləvi tədbirlər, eləcə də Novruz bayramı təxirə salınıb. Azərbaycanın İranla sərhədində isə gediş-gəliş məhdudlaşdırılıb.
