SOCAR-da çalışan 5 minə yaxın işçi may ayından etibarən öz iş yerini itirə bilər. Bunu hüquq müdafiəçisi, Neftçilərin Hüquqlarının Müdafiəsi İctimai Birliyinin rəhbəri Mirvari Qəhrəmanlı deyir. M.Qəhrəmanlı bunu 4 neft idarəsinin bütün quyularının bağlanacağı ilə əlaqələndirir.
O, Mikroskop Media-ya bildirib ki, həmin idarələrdə 5 minə yaxın insan çalışır.
“Azneft” İstehsalat Birliyində 3 min quyu var, onların 2 mindən çoxu bağlanır. Quyular bağlanacağı halda ştatda olan işçilərin taleyi necə olacaq?! Şirkət bu prosesi ixtisar adlandırmamaq üçün boşdayanma elan etmək fikrindədir . Bu isə mümkün deyil. Çünki bu maddəyə görə işçiyə qısa müddətə ödəniş edilir.
Hüquq müdafiəçisi deyir
Boşdayanma maddəsi nədir: Əmək Məcəlləsinə görə, istehsal, axın xətti və iş işəgötürənin təqsiri ucbatından dayandırılarsa, işçilər qrup halında ödənişsiz məzuniyyətə buraxıla bilməz. Bu, boşdayanma hesab edilir və onlara bu məcəllənin 169-cu maddəsində nəzərdə tutulan məbləğdə əmək haqqı ödənilir. Həmin məbləğ işçi üçün müəyyən edilən dərəcənin tarif (vəzifə) maaşının üçdə iki hissəsindən az olmayaraq ödənilir.
SOCAR quyuları niyə bağlayır: Buna səbəb OPEC-in qərarıdır. Qərara görə, “Azərneft” İstehsalat Birliyinin gündəlik planlaşdırılan neft hasilatı 2500 ton azaldılıb.
Quyuların sonradan açıla bilərmi: Quyuların bir müddət sonra açılma ehtimalı olsa da onları istismara qaytarmaq böyük vəsait tələb edir. Həmçinin yeni quyuların qazılması ehtimalı da var. Mirvari Qəhrəmanlının dedikləri barədə SOCAR-dan münasibət öyrənmək mümkün olmayıb.