Provayder “Azercell Telekom” AXCP sədri Əli Kərimlinin mobil rabitə və internetinin bloklanması ilə onların bağlılığı olmadığını bildirib. Turan -ın sorğusuna cavab verən provayder bildirib ki, onlar qanunvericiliyə əsasən bütün müştərilərə bərabər davranır və siyasi baxışlarına görə fərq qoymur.
Müştəri məlumatlarının məxfiliyinə xüsusi diqqət yetirdiyini deyən Azercell əlavə edib ki, aşağıdakı hallar yoxdursa, müştərinin nömrəsinin və internetinin bloklanması tətbiq edilmir:
- Abunəçinin borcu yoxdursa
- Limiti keçməyibsə
- Abunəçi özü bunu xahiş etməyibsə
Azercell bildirib ki, karantin günlərində trafikin yüklənməsinin xeyli artmağı problem yarada bilər:
Bu da mobil telefon nömrəsinin istifadə edildiyi ərazidən, istifadə olunan cihazın müxtəlif texnologiyaları dəstəkləməsindən, konkret əhatə dairəsində həmin an üçün mövcud olan istifadəçilərin sayından və digər texniki nüanslardan asılı olaraq, məlumat mübadiləsində gecikmələrə və keyfiyyət göstəricilərində dəyişikliklərə səbəb ola bilər. WhatsApp və Telegram və sosial şəbəkələrinə gəlincə, bu proqramların və onlardakı istifadəçi hesablarının idarə edilməsinin “Azercell Telekom” MMC-yə heç bir aidiyyatı yoxdur.
Nə baş verib: AXCP sədri Əli Kərimli onun mobil rabitəsinin kəsildiyini və internetə çıxışının 10 gündən artıqdır ki, bloklandığını bildirib. Partiya sədri bu addımın siyasi məqsəd daşıdğını vurğulayıb.
