Vəkil Elçin Sadıqovun Azərbaycan Xalq Cəbhəsi Partiyasının həbsdə olan fəalı Əlizamin Salayevlə görüşünə icazə verilməyib. Bu barədə Elçin Sadıqov özü məlumat yayıb. O bildirib ki, görüşə gedəndə onun orderinin təsdiq edilmiş surəti də olub, amma yenə də icazə verilməyib:
Bəhanə kimi onu qeyd etdilər ki, guya mən işə baxmış və artıq hökm çıxarmış məhkəmədən məktub almalıyam. Bildirdim ki, hökm qəbul etdikdən sonra hakimin işə vəkili buraxmaq və ya buraxmamaq məsələsinə baxmaq səlahiyyəti olmadığı üçün hakim belə bir məktub verə bilməz. Bundan sonra dedilər ki, guya mən orderimi Penitensiar Ximdətə verməli və oradan icazə almalıyam. Bunun qanunvericlikdə nəzərdə tutulmadığını onların diqqətinə çatdırsam da mənə yenə görüş vermədilər. Bununla mənim peşə fəaliyyətimə və Salayev Zamin Oktay oğlunun müdafiə hüququna müdaxilə etdilər.
E.Sadıqov deyib ki, o, bu faktla bağlı Penitensiar Xidmətə və İnsan Hüquqları Müvəkkilinə şikayət göndərib.
