“Human Rights Watch” Milli Şuranın üzvü Tofiq Yaqublunun həbsindən iki ay keçməsi ilə bağlı bəyanat yayıb. Təşkilat yazır ki, həm Avropa Şurası, həm də ABŞ Bakını T.Yaqublunu azad etməyə çağırıb və hüquq müdafiə təşkilatı Amnesty International da onu vicdan məhbusu elan edib.
“Azərbaycan hökuməti bu çağırışlara qulaq asmalı və onu azad etməlidir” – bəyanatda qeyd olunur.
Təşkilar qeyd edir ki, T.Yaqublu prezident İlham Əliyevin koronavirus pandemiyası ilə bağlı çıxışında virusla mübarizə adı altında siyasi müxalifəti sıxışdıracağına işarə etməsindən 3 gün sonra həbs edilib:
“Hakimiyyət T.Yaqublunun həbsinə bəhanə tapmağa vaxt sərf etmədi, onu saxta xuliqanlıq ittihamıyla saxladı. Hökumətləri məhbus sayını azaltmağa, bununla da Covid-19-un yayılma riskini azaltmağa çağırırlar. Azərbaycan hakimiyyəti isə T.Yaqublunu Şüvəlandakı 3 saylı təcridxanada saxlayır. Bu təcridxana məhbus sayına, çirkli kameralarına və ventilyasiya sistemlərinə görə tənqid olunur”.
Nə baş verib: T.Yaqublu martın 22-də həbs olunub. Martın 23-də isə Nizami Rayon Məhkəməsi onun barəsində 3 aylıq həbs qətimkan qərarı çıxarıb. Siyasi fəal Cinayət Məcəlləsinin 221.3-cü maddəsilə, silah və ya silah qismində istifadə olunan əşyalar vasitəsilə xuliqanlıq etməkdə ittiham olunur.
