Səudiyyə Ərəbistanının İstanbuldakı konsulluğunda öldürülən jurnalist Camal Qaşıqçının ailəsi onun qatillərini bağışladığını açıqlayıb. Bu barədə jurnalistin oğlu Salah Qaşıqçı Twitterdə yazıb:
“Biz, şəhid Camal Qaşıqçının oğulları elan edirik ki, atamızı öldürənləri bağışlayırıq, mükafatımızı Uca Allahdan gözləyirik”.
“The Washington Post” yazıb ki, jurnalistin övladlarına milyon dollarlıq evlər verilib və hər ay hökumət onlara yüzminlərlə dollar ödəyir. Salah Qaşıqçı isə bu məlumatları təkzib edib.
Nə baş verib: ABŞ-da yaşayan jurnalist “The Washington Post” qəzeti ilə əməkdaşlıq edir və Səudiyyə Ərəbistanı hakimiyyətini tənqid edən yazılar dərc etdirirdi. 2018-ci ilin oktyabrında boşanma sənədlərini təqdim etmək üçün ölkəsinin İstanbuldakı konsulluğuna gedən jurnalist yoxa çıxdı.
Bir neçə həftə sonra Ər-Riyadd rəsmiləri jurnalistin diplomatik nümayəndəlik ərazisində öldüyünü etiraf etsələr də, hadisənin baş verməsi barədə izahdan imtina etdilər.
23 dekabr 2019-cu ildə məhkəmə jurnalistin qətlində təqsirli hesab etdiyi 5 nəfər barəsində edam hökmü çıxarıb, daha 3 nəfər isə 24 il müddətinə azadlıqdan məhrum edilib. Məhkumların kimliyi barədə məlumat mediaya açıqlanmır.
