Daxili işlər Nazirliyi sosial şəbəkələrdə yayılan it döyüşləri ilə bağlı araşdırma aparıldığını bildirir. Nazirliyin mətbuat xidmətinin rəhbəri Ehsan Zahidov “Report”a deyib ki, it döyüşləri təşkil edənlərin 6 nəfər olduğu müəyyən edilib.
“Onların törətdikləri əmələ müvafiq olaraq hüquqi qiymət verilməsi və məsuliyyətə cəlb olunmaları istiqamətində araşdırmalar davam etdirilir”, E.Zahidov qeyd edib.
Nə baş verib: Sosial şəbəkələrdə it döyüşləri ilə bağlı video və fotolar yayılıb. İddia edilir ki, təşkilatçılar itləri ölənə qədər döyüşdürür, daha sonra məğlub olan iti kəsib, ətini digər itlərə yedizdirirlər. Pulla döyüşlər təşkil edənlərin Sumqayıt şəhərində yaşadığı ehtimal edilir.
