Türkiyə ordusu İraqın şimalındakı Haftanin bölgəsində hərbi əməliyyatlara başladığını açıqlayıb. Türiyə Müdafiə Nazirliyinin yaydığı məlumata görə, “Pəncə-Pələng” adlı əməliyyatın keçirilməsində məqsəd ölkə sərhədləri üçün təhlükəli hesab olunan PKK-nı zərərsizləşdirməkdir.
Türkiyə Ordusu bölgəyə hava hücumundan müdafiə qüvvələri və eləcə də pilotsuz təyyarələrlə girib.
Əməliyyatla bağlı Twitter-də məlumat yayan nazirliyin açıqlamasında o da qeyd olunub ki, bu əməliyyat beynəlxalq hüquqa zidd deyil:
Bu əməliyyat PKK və digər terrorçu ünsürlərin son vaxtlar polis məntəqələrimiz və hərbi bazalarımıza hücumlarının artması ilə əlaqədar olaraq beynəlxalq hüquqa əsasən bizim qanuni müdafiə haqqımız çərçivəsində icra edilir.
Nə baş verib: Türkiyə əsasən İraqın şimalında və cənub-şərqindəki Kürdüstan bölgəsində mənzillənən PKK silahlılarını mütəmadi olaraq hədəf alır.
PKK nədir: Türkiyə, ABŞ və Avropa Birliyinin terror təşkilatı kimi tanıdığı PKK (Kürd İşçi Partiyası) 1984-cü ildə Türkiyəyə qarşı savaşmağa başlayıb. Bu konfliktdə indiyə qədər 40 mindən çox insan öldürülüb.
