“Müsəlman Birliyi” Hərəkatının üzvü, Nardaran məhbusu Abbas Hüseyn həyatının təhlükədə olduğunu deyir. O, bu barədə ictimaiyyətə ünvanladığı məktubunda yazıb. Abbas Hüseyn bildirir ki, pandemiyaya görə məhbuslara sovqat gətirilməsi qadağasına etiraz məqsədilə aclıq aksiyası keçirdiyinə görə cəzalandırılıb:
Etirazlarıma görə məni cəza olaraq 3 həftə hamamdan, ailəmlə telefon zənglərindən məhrum etdilər. İki dəfə ardıcıl karsa salındım. Rəis və müavinləri məni ağzıüstə yerə yıxıb təhqir edir, öldürüb adını intihar qoymaqla hədələyirdilər. Üstümə 20-25 nəfər dəyənəkli nəzarətçi göndərdilər, qaldığım kameranı dağıtdılar, bəzi əşyalarım yoxa çıxıb. Bir aya yaxındır ki, əslində pulsuz olan konvert üçün pul versəm də, mənə məktub yola salmağa imkan verilmir. Məktubların hamısını rəis oxuyur
Nardaran məhbusu deyir ki, Avropa Şurası Parlament Assambleyasının Azərbaycanda siyasi məhbuslar üzrə məruzəçisi Torhildur Sunna ilə görüşdən sonra ona qarşı münasibət daha da sərtləşib:
Bəzi dustaqların əliylə həyatıma təhlükə yaratmaq istəyirlər. Göz görə-görə mənə qarşı təxribat hazırlayırlar. Hər gün fiziki işgəncədən betər psixioloji zərbələr alıram.
Abbas Hüseyn kimdir: A.Hüseyn 2015-ci il noyabrın 26-da Daxili İşlər Nazirliyinin (DİN) Baş Mütəşəkkil Cinayətkarlıqla Mübarizə İdarəsinin Bakının Nardaran qəsəbəsində keçirdiyi əməliyyat zamanı həbs olunub. 2017-ci il yanvarın 25-də Bakı Ağır Cinayətlər Məhkəməsinin qərarı ilə o, 20 il müddətinə azadlıqdan məhrum edilib.
