Səhiyyə naziri Oqtay Şirəliyev Operativ Qərargahın keçirdiyi 21 brifinqin heç birində iştirak etməyib.
Mikroskop Media nazirin brifinqlərdə iştirak etməməsinin səbəbi barədə məlumat almaq üçün Səhiyyə Nazirliyinə müraciət edib. Nazirliyin mətbuat xidmətinin əməkdaşı Elvin Hacıyev bildirib ki, brifinqlərə kimin çıxacağı barədə qərarı Operativ Qərargah verir.
Yanvarın 1-dən ölkədə bütün dövlət tibb müəssisələri TƏBİB-in tabeliyinə verilib, müayinə və müalicə məsələlərinə bu qurum cavabdehdir. Müalicə prosesinə cavabdeh qurum kimi də brifinqlərə TƏBİB nümayəndələri çıxır. Brifinqlərə kimin çıxacağı barədə qərarı Operativ Qərargah verir.
Elvin Hacıyev
Nə baş verib: Fevralın 27-də COVID-19 pandemiyasının yarada biləcəyi təhlükənin qarşısını almaq, profilaktik tədbirlərin operativ həyata keçirilməsi məqsədilə Nazirlər Kabineti yanında Operativ Qərargah yaradılıb.
Operativ Qərargah nə iş görür: Qərargah yaradıldığı gündən indiyədək 21 brifinq keçirib və bu brifinqlərdə vəziyyətlə bağlı əhalini məlumatlandırıb, brifinqə buraxılan jurnalistlərin suallarını cavablandırıb.
Niyə “brifinqə buraxılan jurnalistlər”: Operativ Qərargahın keçirdiyi brifinqlərə müstəqil jurnalistlərin girişinə icazə verilmir. TƏBİB-in sözcüsü Rəvanə Əliyeva bunu hansısa siyahı ilə əsaslandıraraq, jurnalistlərin dəvətlə həmin brifinqlərdə iştirak etdiyini açıqlayıb.
