Avropa İnsan Haqları Məhkəməsi (AİHM) hüquqşünas Xalid Bağırovun hüquq pozuntularını tanıyıb. Qurumun rəsmi saytında qeyd olunan məlumata görə, bu barədə qərar iyunun 25-də açıqlanıb.
Hüquqşünas AİHM-ə vəkillik fəaliyyətinin 1 il müddətinə dayandırılması və daha sonra fəaliyyətinə xitam verilməsi ilə bağlı şikayət edib. Onun hər iki şikayəti Azərbaycan hökuməti ilə 2015-ci və 2016-ci illərdə kommunikasiya edilib.
AİHM hansı pozuntuları tanıyıb: X.Bağırovun Konvensiyanın 10-cu (ifadə azadlığı) və 8-ci (şəxsi həyata hörmət) maddələri ilə təmin olunan hüququları pozulub.
Nə qədər cərimə təyin edilib: Hüquqşünasa dəymiş mənəvi zərərə görə, hökumət ona 18 000 avro təzminat ödəməli olacaq.
Nə baş verib: Xalid Bağırov 2011-ci ildə Azərbaycanda polis zorakılığından bəhs edəndən sonra Bakı Şəhər Baş Polis İdarəsi Vəkillər Kollegiyasına ondan şikayət edib. Kollegiya X.Bağırov barəsində intizam icraatı başladıb və onun vəkillik fəaliyyətini 1 illik dayandırıb. Daha sonra 2014-cü ildə yenidən vəkilə qarşı intizam icraatı başladılıb. Bu dəfə intizam icraatı onun siyasətçi İlqar Məmmədovu cinayət işi üzrə müdafiə edərkən verdiyi açıqlamalarla bağlı olub. Həmin vaxt kollegiya X.Bağırovun vəkillik fəaliyyətinə xitam verilməsi üçün məhkəməyə müraciət edib və məhkəmə kollegiyanın müraciətini qəbul edib.
