İyunun 26-da İranın paytaxtı Tehranda güclü partlayış olub.
The Guardian yazır ki, hakimiyyət ölkənin keçmiş nüvə sınaqlarının keçirildiyi iddia edilən bir hərbi bazanın yaxınlığındakı partlayışla bağlı araşdırma aparır.
Yerli KİV-in sosial şəbəkədə paylaşdıqları video və fotolardan görünür ki, şəhərin səmasında əvvəlcə parlaq bir işıq, ardınca böyük tüstü görünür. Şahidlər partlayışın hərbi ərazi sayılan Parçin istiqamətində olduğunu bildirib.
Rəsmilər nə deyir: Müdafiə Nazirliyinin sözçüsü Davud Abdi partlayışın hərbi bazada deyil, Parçinin ictimai ərazisindəki qaz anbarında baş verdiyini deyib. Nazir yanğının söndürüldüyünü və tələfat olmadığını bildirib, amma partlayışın səbəbi haqqında məlumat verilməyib.
Parçin nədir: İran texniklərinin nüvə başlığı üçün yüksək partlayıcı komponentləri sınaqdan keçirdikləri iddia edilən hərbi bazadır. İran bu iddiaları rədd edir.
2014-cü ildə hərbi sahənin yanğın və ya partlayış nəticəsində ziyan gördüyü barədə şübhələr yarandı, lakin Beynəlxalq Atom Enerjisi Agentliyinin araşdırmaları giriş qadağasına görə əngəlləndi.