Prezident İlham Əliyev iyulun 15-də Nazirlər Kabinetinin iclasında könüllü hərbi xidmətə yazılanlar barədə danışıb. O deyib ki, bu günlər ərzində minlərlə insan “Qarabağda vuruşmaq istəyirəm” fikirləri səsləndirsə də Səfərbərlik və Hərbi Xidmətə Çağırış üzrə Dövlət Xidmətinə təqribən 150 nəfər müraciət edib. Onlardan 60 nəfər Tovuzdan, qalanları isə Azərbaycanın digər bölgələrindən olub.
Bəzi tənqidçilər və hərbi ekspertlər hesab edir ki, prezidentin bu rəqəmi səsləndirməsi dövlət sirrini yaymaqdır.
Hərbi sirr nədir? Könüllü hərbi xidmətə yazılanların sayının açıqlanması hərbi sirrin pozulmasıdırmı? Hüquqşünas Emin Abbasov izah edir!
Hərbi sirr nədir?
“Dövlət sirri haqqında” Qanuna görə hərbi sirlər, dövlət sirri sayılır. Həmin qanunun 5-ci maddəsi hərbi sahədə hansı məlumatların dövlət sirrini təşkil etdiyini müəyyən edir. Buraya aid edilib:
- Qoşunların dislokasiyası;
- Həqiqi adları;
- Təşkilati strukturu;
- Şəxsi heyətinin sayı;
- Döyüş təminatı
- Hərbi-siyasi və ya əməliyyat şəraiti haqqında məlumatlar.
Könüllü hərbi xidmətə yazılanların sayının açıqlanması hərbi sirrin pozulmasıdırmı?
Ölkənin hərbi səfərbərlik üçün ehtiyatda olan çağırışçı və könüllülərinin sayı haqqında məlumatlar hərbi sirr kimi səciyyələndirilən məlumatlar sırasına aid edilməyib.
Hərbi sirr yaymaq cinayət məsuliyyəti yaradırmı?
Cinayət Məcəlləsinin 284-cü maddəsi ilə şəxsin ona etibar edilmiş və ya xidməti vəzifəsinə, yaxud işinə görə ona məlum olan dövlət sirrini təşkil edən məlumatların yayılması əməli cinayət məsuliyyəti yaradır.
Hərbi sirri yayan haqqında hansı cəza nəzərdə tutulub?
Bu əmələ görə 3 ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə 3 ildən 6 ilədək müddətə azadlıqdan məhrum etmə ilə cəzası nəzərdə tutulub.
Eyni əməllər ağır nəticələrə səbəb olduqda— 3 ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə 4 ildən 8 ilədək müddətə azadlıqdan məhrum etmə ilə cəzalandırılır.