Siyasi Məhbusların Vahid Siyahısı üzrə İşçi Qrupu 12-15 iyul tarixində baş verən hadisələrlə bağlı açıqlama yayıb və bir sıra tələblər irəli sürüb.
Açıqlamada deyilir ki, Azərbaycan-Ermənistan sərhədindəki döyüşlər başlayandan sonra həm paytaxtda, həm də rayonlarda səfərbərlik tələbi və orduya dəstək məqsədilə yürüşlər keçirilib. Bakıda keçirilən yürüşlə bağlı danışan prezident İlham Əliyev isə müxalifəti, AXCP-ni təxribat törətməkdə ittiham edib. Bundan sonra sonra həbslər başlayıb və AXCP-nin 7 fəalı saxlanılıb:
“Bakıda, digər şəhər və rayonlarda xeyli sayda insanın saxlanılaraq polis bölmələrinə aparıldığı, orada qeyri-insani şəraitdə saxlandığı, fiziki və psixi təzyiqlərə məruz qaldığı barədə məlumatlar var.
Bunları nəzərə alaraq İşçi Qrup tələb edir:
– İyulun 15-i gecə saatlarında Milli Məclisin qarşısında baş verən hüquq pozuntuları ilə bağlı obyektiv və qərəzsiz araşdırma aparılsın;
– Saxlanılanların müdafiəçiyə çıxış, yerli və beynəlxalq hüquqla təminat verilən haqları təmin edilsin;
– Hakimiyyətin öz opponentlərini qanunsuz cinayət təqiblərinə məruz qoymaq praktikasına dərhal son qoyulsun, heç bir günahı olmadıqları halda siyasi motivlərlə həbs olunan bütün fəalların dərhal azad olunsun.
