Avropada ayrı-ayrı ölkələr koronavirusun ikinci dalğasına hazırlaşır ki, bu da yenidən karantin məhdudiyyətlərinin qoyulması ehtimalını artırır.
Belçika hökuməti 17-23 iyul tarixlərində yoluxma sayının 71% artması səbəbi ilə ölkədə ciddi karantin xəbərdarlığı edib.
Baş nazir Sofi Vilmes deyib ki, yayılmanı azalda bilməsək, bu, kollektiv uğursuzluq olacaq.
İspaniyanın Kataloniya bölgəsi 10 gün ərzində yoluxmanı nəzarət altına alınmayacağı təqdirdə yenidən məhdudiyyətlər tətbiq edə bilər. Orada yoluxma əsasən tətilə gedənlər, meyvə və tərəvəz yığan mövsümi işçilər arasında müəyyən edilib.
Son iki həftədə bütün İspaniyada 16 min, Kataloniyada 8 min yoluxma qeydə alınıb.
Fransanın səhiyyə naziri Olivier Veran gənclər arasında yoluxmanın artmasından sonra hər kəsi ayıq olmağa çağırıb.
Almaniyanın ictimai sağlamlıq üzrə məsləhətçi orqanı son bir neçə həftə ərzində koronavirusa yoluxma sayının artmasından narahatlıq keçirdiyini bildirib.
Ümumdünya Səhiyyə Təşkilatı nə deyir: ÜST deyir ki, Avropa payızda ikinci dərəcəli koronavirus dalğası ilə üzləşə bilər ki, bu da qrip və qızılca xəstəliyinin yayılma mövsümü ilə müşayiət oluna bilər.
