Daxili İşlər Nazirliyi (DİN) sosial şəbəkələrdə Azərbaycan Xaql Cəbhəsi Partiyasının (AXCP) funksioneri Fuad Qəhrəmanlı və Seymur Əhmədovun işgəncələrə məruz qalması ilə bağlı iddialara münasibət bildirib. DİN-in mətbuat xidmətinin rəisi Ehsan Zahidov yayılan məlumatların həqiqəti əks etdirmədiyini bildirib:
Sosial mediada Seymur Əhmədovun saxlanma yerində işgəncə və zorakılığa məruz qalması ilə əlaqədar həqiqətə uyğun olmayan informasiyalar yayılıb. Bununla əlaqədar DİN rəhbərliyinin göstərişi ilə əməkdaşlar saxlanma yerində olub S.Əhmədovun izahatını alıblar. S.Əhmədov barəsində yazılanları birmənalı olaraq təkzib edib”.
DİN rəsmisi Fuad Qəhrəmanlının Baş Mütəşəkkil Cinayətkarlıqla Mübarizə İdarəsində işgəncələrə məruz qalması iddialarını da təkzib edib:
Fuad Qəhrəmanlı adlı şəxs ümumiyyətlə qeyd olunan İdarəyə gətirilməyib və orada olmayıb. Bu məlumatlar həqiqəti əks etdirmir”.
Nə baş verib: AXCP F.Qəhrəmanlı, A.Yusifli və partiya fəalı S. Əhmədovdan narahatlığını ifadə edib. Partiya bildirib ki, saxlandıqdan bəri F.Qəhrəmanlı ilə yaxınları və vəkili görüşə bilməyib, onunla əlaqə saxlamaq mümkün olmayıb. Onların işgəncələrə məruz qalması ilə bağlı məlumatların alındığı vurğulanıb.
AXCP-dən verilən məlumata görə, Qarabağ yürüşündən sonra partiyanın 40-dan çox üzvü saxlanıb, onlardan 18-nə cinayət işi açılıb.
