Eldar Həsənov Serbiya Respublikasında, Monteneqroda və Bosniya və Herseqovinada fövqəladə və səlahiyyətli səfiri vəzifələrindən geri çağırılıb. Bu barədə prezident İlham Əliyev avqustun 17-də sərəncam imzalayıb.
Eldar Həsənov avqustun 13-də Cinayət Məcəlləsinin 308.2 (vəzifə səlahiyyətlərindən sui-istifadə etmə, ağır nəticələrə səbəb olduqda) və 308-1.1 (büdcə vəsaitlərini təyinatı üzrə istifadə etməmə) maddələrilə ittiham olunaraq həbs edilib.
Səbail Rayon Məhkəməsinin qərarıyla onun barəsində noyabrın 3-nə qədər həbs-qətimkan tədbiri seçilib.
Eldar Həsənov bundan öncə Azərbaycanın baş prokuroru, baş prokurorun birinci müavini, daxili işlər nazirinin birinci müavini, Gəncənin baş polis idarəsinin rəisi vəzifələrində çalışıb.
Nə baş verib: DTX iyulun 3-də XİN-də keçirdiyi əməliyyat nəticəsində qurumun üç vəzifəli şəxsi həbs olunmuşdu. Belə ki, nazirliyin İşlər idarəsinin müdiri, nazirliyin Tender Komissiyasının sədri Fərhad Molla-zadə, Konsulluq idarəsinin rəisi Faiq Bağırov və digərləri vəzifə səlahiyyətlərindən sui-istifadə etmə, mənimsəmə, rüşvət alma faktlarına görə cinayət məsuliyyətinə cəlb edilərək barələrində məhkəmənin qərarları əsasında həbs qətimkan tədbiri seçilib.
