Orduya dəstək yürüşü ilə bağlı saxlanılan Mehdi İbrahimov barədə ev dustaqlığına buraxılma qərarı çıxarılsa da o evə buraxılmır.
Bu barədə ədliyyə nazirliyinin penitensiar xidmətinin ixtisaslaşdırılmış çəzaçəkmə müəssisəsinə saxlanılan M.İbrahimovun qardaşı Turan İbrahimov məlumat yayıb:
“Mehdini buraxmırlar. Vəkil deyir ki, məhkəmə qərarı var, ev dustaqlığına buraxılmalıdır. Təcili yardım isə deyir bizə tapşırıq verilib, karantinə aparmalıyıq”.
Məhkəmə M.İbrahimovun ev dustaqlığına buraxılması ilə bağlı bu gün, avqustun 19-da qərar verib.
Mehdi İbrahimov nədə ittiham olunur: M.İbrahimov iyulun 15-də orduya dəstək yürüşündən qayıdarkən saxlanılıb. Bir gün sonra bölmədə onun Məmməd İbrahimin oğlu olduğunu biləndə buraxmayıblar. O, atasının siyasi fəaliyyətinə görə cəzalandırılıb.
O, CM-in 139-1 maddəsi ilə – koronavirus olduğu halda, küçəyə çıxıb başqalarına təhlükə yaratmaqda İttiham olunurdu. İddiaya görə, o, iyulun 20-də axşam saatlarında karantin rejimi qaydalarını pozduğuna görə saxlanılıb. Polis bölməsinə gətirilib test aparılandan sonra onda koronavirus aşkarlanıb.
