Avqustun 20-də zəhərlənmə şübhəsi ilə xəstəxanaya aparılan Rusiyanın müxalif siyasətçi Aleksey Navalnı hələ də komadadır. Həkimlər deyir ki, onun vəziyyəti stabil ağırdır.
Navalnıya hələ diaqnoz qoyulmayıb.
Onun dəqiq diaqnozu hələ bilinmir. Omskdakı xəstəxananın həkimləri insult və infarkt riskinin olmadığını, o cümlədən koronavirusa yoluxmadığını deyirlər.
Həyat yoldaşı ilə görüşməyə icazə verilmir.
Yuliya Moskvadan Navalnının yerləşdiyi Omsk xəstəxanasına gəlib, lakin onların görüşünə icazə verilmir. Rusiya prezidenti Vladimir Putinin qatı tənqisçisi olan Navalnı bir il əvvəl təcridxanada olanda da zəhərlənmişdi.
Navalnının tərəfdaşları onu xaricə müalicə üçün göndərməkdə israr edirlər.
Onlar düşünürlər ki, Qərbdə Navalnının şübhəli zəhərlənməsinə nəyin səbəb olduğu daha yaxşı tapılar. Navalnının təsis etdiyi Anti-Korrupsiya Fondu əmindir ki, zəhərlənmə izlərini gizlətməyə çalışaraq onu xaricə göndərmək istəmirlər. Navalnının həkimi Yaroslav Aşikmin də müalicə üçün Avropaya aparılmalı olduğunu deyir.
Navalnını Almaniyaya aparmaq üçün təyyarə göndərilib.
Avqustun 21-də havaya qalxan təyyarə elə həmin gün də Berlinə qayıda bilər, Navalnının Rusiyadan çıxarılması üçün lazım olan sənədlər də hazırdır.
Rusiyalı həkimlər nə deyir: Rusiyalı həkimlər isə onu Omskdakı xəstəxanadan çıxarmağın mümkünsüz olduğunu deyirlər. Həkimlər bunu belə əsaslandırır ki, onun vəziyyəti stabil deyil və hər hansı bir nəqliyyat vasitəsi vəziyyətini ağırlaşdıra bilər.
Siyasətçinin mətbuat katibi nə deyir: Kira Yarmış avqustun 21-də yazıb ki, Alekseyin Avropaya aparılmasına qadağa qoyulması onun həyatına birbaşa təhlükədir:
Omskdakı xəstəxanada avadanlıqsız və diaqnozsuz qalmaq dəhşətlidir”.
İlk hücum deyil: 2018-ci ilin aprelində isə Moskvada Navalnıya hücum edilib və onun gözünə yaşıl kimyəvi məhlul – “zelyonka” atılıb. Navalnının dediyinə görə, bundan sonra sağ gözündə görmə qabiliyyətinin təxminən 80% -ni itirib.