Azərbaycanlı rejissor Rüfәt Hәsәnov Sarayevo Film Festivalında “ən yaxşı rejissor” nominasiyasında qalib gəlib. Bu barədə festivalın “Facebook” səhifəsində məlumat yayılıb. Rüfət Həsənov festivala “Daxildәki ada” filmi ilə qatılıb.
Filmin baş qəhrəmanı həyatı atası və məşqçisi tərəfindən sərt şəkildə idarə olunan gənc azərbaycanlı şahmatçıdır. O, mənəvi və fiziki təzyiqlərdən başını götürüb vəhşi atlar yaşayan və bir sakini olan adaya qaçır.
R.Həsənov həm də filmin ssenari müəllifidir. Filmdə baş rolları Orxan Tarıverdizadə, Vidadi Həsənov, Qurban İsmayılov, Rafiq Əzimov ifa edir.
“Daxildəki Ada” filmi “Sarajevo Film Festival”ının əsas müsabiqə proqramına seçilən ilk tammetrajlı bədii Azərbaycan filmi olub.
Ötən il isə Azərbaycanlı rejissor Hilal Baydarovun “Xurmalar Yetişən Vaxt” filmi də Sarayevo Film Festivalının ən yaxşı sənədli film mükafatına layiq görülmüşdü.
