Azərbaycanın keçmiş baş prokuroru, sabiq səfir Eldar Həsənovun cinayət işi Dövlət Təhlükəsizliyi Xidmətinin istintaq idarəsindən Baş Prokurorluğuna göndərilib. Bu barədə onun vəkili Adil İsmayılov avqustun 24-də məlumat yayıb.
Müdafiə tərəfinin vəsatətlərini nəzərə alaraq obyektiv və ədalətli qərar qəbul etdikləri üçün Eldar Həsənovun adından Dövlət Təhlükəsizliyi Xidmətinin və Baş Prokurorluğun rəhbərliyinə minnətdarlığımızı bildirirəm. Eldar Həsənov həbsini anlaşılmazlıq hesab edir, məsələnin ölkə daxilində, hüquqi müstəvidə öz həllini tapacağına ümid edir və vəsatətin təmin edilməsi onun ümidini artırıb”
deyə A.İsmayılov bildirib.
Azərbaycanın Serbiya, Monteneqro, Bosniya və Herseqovinadakı səfiri Eldar Həsənov avqustun 13-də Xarici İşlər Nazirliyinin fəaliyyət istiqamətləri üzrə maliyyə yoxlamaları zəminində tutulub. O, bundan öncə Azərbaycanın baş prokuroru, baş prokurorun birinci müavini, daxili işlər nazirinin birinci müavini, Gəncənin baş polis idarəsinin rəisi vəzifələrində çalışıb.
Nədə ittiham olunur: Eldar Həsənov vəzifə səlahiyyətlərindən sui-istifadə etməkdə və büdcə vəsaitlərini təyinatı üzrə istifadə etməməkdə ittiham olunur. O, ittihamları qəbul etmir, həbsini əsassız sayır.
Nə baş verib: DTX 2020-ci il iyulun 3-dən XİN-də istintaq-əməliyyat tədbirləri aparıb, nazirliyin İşlər İdarəsinin müdiri, İşlər İdarəsinin təsərrüfat şöbəsinin müdiri, Konsulluq İdarəsinin konsulluq-hüquq şöbəsinin rəisi, Konsulluq İdarəsinin rəisi həbs edilib. Ardında Elmar Məmmədyarovu xarici işlər naziri vəzifəsindən çıxarılıb, onun yerinə sabiq təhsil naziri Ceyhun Bayramov təyin edilib.
