Neftçala rayonunun Xol Qaraqaşlı bələdiyyəsinin üzvü, ictimai fəal Vəfa Nağının bələdiyyə üzvlüyündən uzaqlaşdırılıb. V.Nağının avqustun 25-də yaydığı məlumata görə, bu barədə qərar o,Türkiyədə olanda verilib:
Mən Türkiyədə olanda bələdiyyə sədri Əlibala Səlimov beş gündən bir iclas yığıb və iclaslara qatılmadığıma görə məni üzvlükdən kənarlaşdırıblar. Halbuki, mən iclaslara qatıla bilmədiyimlə bağlı bələdiyyəyə məktub göndərmişdim”.
V.Nağı deyir ki, onun bələdiyyə üzvlüyündən çıxarılmasının səbəbi əslində iclaslara qatılmaması deyil. İctimai fəal dayanmadan bələdiyyədən sənədlər, iclasların protokollarını tələb etdiyini bildirir:
Bələdiyyə üzvünün iclasın protokollarını əldə etmək hüququ var. Amma mənə heç vaxt müxtəlif bəhanələrlə protokollar verilməmişdi. Əslində heç bir iclasın protokolu yoxdur. Mən bunu daima ictimailəşdirirdim deyə, qərara gəliblər ki, məni uzaqlaşdırsınlar”.
V.Nağı məsələ ilə bağlı məhkəməyə müraciət edəcəyini qeyd edib.
Qanun nə deyir: Bələdiyyələrin statusu haqqında qanunun 22-ci maddəsinin 6-cı bəndinə görə, ardıcıl olaraq 3 dəfə bələdiyyə iclaslarını üzrsüz səbəbdən buraxdıqda və ya il ərzində keçirilən iclasların yarısından çoxunda üzrsüz səbəbdən iştirak etmədikdə bələdiyyə üzvünün səlahiyyətinə xitam verilir.
