Avropanın ən böyük siyasi partiyalarından biri, Avropa Parlamentində fraksiyası olan Avropa uğrunda Liberallar və Demokratlar Alyansı (ALDE) Tofiq Yaqublunun aclığa başlaması ilə bağlı bəyanat yayıb.
Sentyabrın 7-də dərc olunan bəyanatda deyilir ki, Müsavat Partiyasının fəalı Tofiq Yaqublu 2020-ci ilin martında Azərbaycan prezidentinin müxalifətə qarşı təzyiqlər üçün koronavirusla mübarizədə nəzərdə tutulmuş tədbirlərdən istifadə ediləcəyini deməsindən 3 gün sonra həbs olunub.
Yaqublu bütün ittihamları rədd edib və Müsavat Partiyası dərhal həbsin siyasi motivli olduğunu bəyan edib”
bəyanatda qeyd olunur.
Avropa Şurası Parlament Assambleyasının 3 məruzəçisi Azərbaycanı müxalif siyasətçinin işinə yenidən baxmağa çağırıb. Onlar cəzanın ağırlığından narahat olduqlarını və Azərbaycan hakimiyyəti tərəfindən uydurma “xuliqanlıq” ittihamlarının daha əvvəllər də siyasi müxalifəti susdurmaq üçün istifadə edildiyini vurğulayıblar.
ALDE bəyan edib ki, T.Yaqublunun vəziyyətini yaxından izləməyə davam edəcək. Qurum 2019-cu ilin oktyabrında Afinadakı son konqresində Azərbaycandakı bütün siyasi məhbusların sərbəst buraxılması çağırışını bir daha təkrar edib.
