Azərbaycan hökuməti hazırda Avropanın müxtəlif ölkələrində müvəqqəti məskunlaşmış 7 nəfəri İnterpol xətti ilə axtarışa verib. Bu barədə Baş Prokurorluğun sentyabrın 8-də yaydığı məlumatda deyilir.
Beynəlxalq axtarışa verilən şəxslər ötən il Azərbaycana deportasiya edilən Elvin İsayevlə iş birliyində ittiham olunurlar.
Nə baş verib: E. İsayev Ukrayna miqrasiya qanunvericiliyinin tələblərini pozmaq ittihamı ilə 12 dekabr 2019-cu il tarixdə Azərbaycana deportasiya olunub və həbs olunub.
Kimlər axtarışa verilib: E.İsayevin qabaqcadan əlbir olduğu bir qrup şəxs halında cinayət əməllərində iştirak etmiş Orduxan Bəbirov, Qurban Məmmədov, Orxan Ağayev, Rəfael Piriyev, Əli Həsənəliyev, Tural Sadıqlı və Süleyman Süleymanlı barəsində həbs qətimkan tədbiri seçilərək, axtarışa veriliblər.
Hansı maddələrlə ittiham edilirlər: Cinayət Məcəlləsinin 12.1, 34.2, 220.2 – qabaqcadan əlbir olan bir qrup şəxs tərəfindən hakimiyyət nümayəndəsinin qanuni tələblərinə fəal şəkildə tabe olmamağa və kütləvi iğtişaşlara, habelə vətəndaşlara qarşı zorakılıq etməyə çağırışlar etmə
12.1, 34.2, 281.2 – qabaqcadan əlbir olan bir qrup şəxs tərəfindən təkrar dövlət əleyhinə yönələn açıq çağırışlar etmə maddələri ilə ittiham olunurlar.
Prokurorluq nə deyir: E. İsayev 2018-ci ilin əvvəllərində “Youtube” və “Facebook” sosial şəbəkələrində yerləşdirdiyi video müraciətlərdə hakimiyyətin zorla ələ keçirilməsi, konstitusiya quruluşunun zorla dəyişdirilməsinə çağırışlar edib.
