Belarus müxalifətinin liderlərindən biri olan Maria Kolesnikova sentyabrın 8-i səhər saatlarında Belarus-Ukrayna sərhədində saxlanılıb.
Belarus Dövlət Sərhəd Komitəsinin yaydığı məlumatda belə deyilir. Qurum iddia edir ki, Kolesnikova və Belarus müxalifətinin Koordinasiya Şurasının iki üzvü Anton Rodnenkov və İvan Kravtsov avtomobillə hərəkət edərkən saxlanılıblar. Rəsmi xəbərdə deyilir ki, sərhəd keşikçilərini görən kimi avtomobil sürətlənib və kolesnikova avtomobildən çölə itələnib. Ukrayna sərhəd xidməti Kravtsov və Rodnenkovun keçid məntəqəsinə gəldiklərini və sərhəd nəzarətindən keçdiklərini bildirib.
Belarus isə hər 2 şəxsin saxlandığını vurğulasa da, Ukrayna tərəfi bunu təkzib edib.
İnterfaks yazır ki, M.Kolesnikovanı Belarusdan zorla deportasiya etmək istəyiblər, lakin o, pasportunu cırıb və bunun qarşısını alıb. Ukraynanın daxili işlər nazirinin müavini Anton Qeraşenko Kolesnikovanı müşayiət edən Rodnenkov və Kravtsovun Belarusdan qovulduğunu bəyan edib :“Bu, könüllü gediş deyildi, doğma ölkədən zorla qovulmaq idi”. Onun sözlərinə görə, Kolesnikova deportasiyasının qarşısını alıb.
Nə baş verib: Sentyabrın 7-də Kolesnikova, Rodnenkov və Kravtsov ünsiyyəti dayandırıblar. Şahidlərin sözlərinə görə, mülki geyimli və maskalı şəxslər Kolesnikovanı Minskin mərkəzində tutub bir mikroavtobusa mindiriblər və onu naməlum istiqamətə aparıblar. Daxili işlər nazirliyi, İstintaq Komitəsi və Dövlət Nəzarət Komitəsi Kolesnikovanın tutulması barədə məlumatsız olduqlarını bildiriblər.
