Komaya düşəndən sonra müalicə üçün Almaniyanın “Charite” xəstəxanasına aparılan rusiyalı siyasətçi Aleksey Navalnı tamamilə özünə gəlib. Bu barədə sentyabrın 10-da “Insider” nəşri yazıb. Məlumata görə, Navalnının vəziyyəti gözlənildiyindən də yaxşıdır. O, hətta zəhərlənmədən öncə baş verən hadisələri də xatırlayır və yenidən danışmağa başlayıb.
Həkimlər hesab edir ki, siyasətçi pilotların təyyarəni Omska sürətlə endirməsi və hava limanında atropin qəbul etməsinin sayəsində sağ qalıb.
Həkimlər ona baş çəkilməyinə də icazə veriblər. Bundan əvvəl ona sadəcə həkimlər və həyat yoldaşı baş çəkə bilirdi.
Siyasətçi necə mühafizə plunur: “Insider” yazır ki, siyasətçi ilə görüşmək üçün 3 təhlükəsizlik xəttini aşmaq lazımdır. Navalnının zəhərlənməsi təsdiqlənəndən sonra xəstəxananın mühafizəsi gücləndirilib.
Necə zəhərlənib: Almaniya bundan əvvəl bəyan etmişdi ki, A.Navalnı “Noviçok” qrupundan olan maddə ilə zəhərlənib və təsadüfən sağ qalıb.
Nə baş verib: 44 yaşlı siyasətçi Aleksey Navalnı avqustun 20-də Sibirdən Moskvaya uçarkən onun halı pisləşib, təyyarə Omskda təcili eniş etməli olub. Müxalifətçi Omskda xəstəxanada iki gün qalıb, daha sonra Almaniyaya aparılıb.
İlk hücum deyil: 2018-ci ilin aprelində isə Moskvada Navalnıya hücum edilib və onun gözünə yaşıl kimyəvi məhlul – “zelyonka” atılıb. Navalnının dediyinə görə, bundan sonra sağ gözündə görmə qabiliyyətinin təxminən 80% -ni itirib.
