Fransa və İsveçdə iki müstəqil laboratoriya Rusiyanın müxalif lideri Aleksey Navalnının “Noviçok” qrupundan olan qazla zəhərləndiyini təsdiqləyib.
Almaniya hökumətinin yaydığı məlumata görə, artıq 3 laboratoriya bunla bağlı dəlil təqdim edib.
Almaniya həmçinin “Kimyəvi Silahların Qadağan olunması Təşkilatı”nın (“OPCW”) mütəxəssislərinə də nümunələr göndərib.
Biz yenidən Rusiyanı baş verənləri izah etməyə çağırırıq. Avropalı tərəfdaşlarımızla sıx əlaqə qururuq və onlarla gələcək addımları müzakirə edirik “
deyə Almaniya hökuməti bəyan edib.
Nə baş verib: 44 yaşlı siyasətçi Aleksey Navalnı avqustun 20-də Sibirdən Moskvaya uçarkən onun halı pisləşib, təyyarə Omskda təcili eniş etməli olub. Müxalifətçi Omskda xəstəxanada iki gün qalıb, daha sonra Almaniyaya aparılıb.
İlk hücum deyil: 2018-ci ilin aprelində isə Moskvada Navalnıya hücum edilib və onun gözünə yaşıl kimyəvi məhlul – “zelyonka” atılıb. Navalnının dediyinə görə, bundan sonra sağ gözündə görmə qabiliyyətinin təxminən 80% -ni itirib.
