Hazırda Türkiyədə müalicə alan hüquq müdafiəçisi Oktay Gülalıyevin ailəsi onun xərclərinin Heydər Əliyev Fondu tərəfindən qarşılanmasından imtina edib. Bu barədə məlumat yayan oğlu Təbriz Gülalıyev bildirib ki, atasının ölkəyə qaytarılması üçün həm yazılı, həm də şifahi müraciət ediblər:
Bəli, bu bir etirazdır. Çünki atam 11 aydır komada olsa da heç bir istintaq aparılmır. Məhkəmənin başladılmaması üçün süni gecikdirmələr, bəhanələr gətirirlər; gah pandemiya dövrü olduğunu, gah ailənin, gah da şəxsən Oktay Gülalıyevin burada, yəni Azərbaycanda olmasının vacibliyini bildirirlər. Bütün bəhanələrə son qoymaq və atamın bu vəziyyətə düşməsinə səbəb olanların hüquqi müstəvidə cəzalandırılması üçün vətənə qayıdırıq”.
T.Gülalıyev Bakıda da onlara süni əngəl yaradılacağı halda hüquqi formada etirazlarını davam etdirəcəklərini deyib:
Heç bir halda bu cinayət üstü örtülü qalmayacaq!”.
Oktay Gülalıyev kimdir: Hüquq Müdafiəçisi kimi fəaliyyət göstərən Oktay Gülalıyev Repressiya və İşgəncələr Əleyhinə Komitənin koordinatorudur.
Nə baş verib: 2019-cu il oktyabrın 29-da Oktay Gülalıyevi avtomobil vurub.
Qəzanın videogörüntülərinə əsasən, hadisə O.Gülalıyev piyadalar üçün nəzərdə tutulan keçiddən keçərkən baş verib.
Hüquq müdafiəçisi əvvəlcə 1 saylı Təcili Tibbi Yardım Mərkəzinə, sonradan “City Hospital”a köçürülüb. Daha sonra isə Neyrocərrahiyyə Klinikasına aparılıb. Sonradan Heydər Əliyev Fondu onun müalicə xərclərini öz üzərinə götürüb və O.Gülalıyev müalicəsini davam etdirmək üçün Türkiyənin İstanbul şəhərinə aparılıb.