İranda 11 avqustdan bəri aclıq aksiyası keçirən məhbus hüquq müdafiəçisi Nəsrin Sotude saxlanıldığı Evin həbsxanasından xəstəxanaya aparılıb.
İrandakı İnsan Haqları Mərkəzinin (Center for Human Rights in Iran – CHRI) sentyabrın 20-də yaydığı məlumatda deyilir ki, N.Sotudenin əri Rza Xandan bu barədə danışıb.
Onun sözlərinə görə, ailə üzvlərinə hüquq müdafiəçisini ziyarət etməyə icazə verilib:
Ziyarət çox ani oldu. O, çox zəifləyib, sifəti düşüb, gözləri çuxura düşüb, arıqlayıb”.
CHRI-nin icraçı direktoru Xadi Qaemi deyib ki, İran rəsmiləri Nəsrinin vəziyyətinin pisləşdiyini gizlətməyə çalışa bilər, ancaq dünya onun aqibətindən hökuməti məsul tutacaq.
Nəsrin Sotude kimdir: Nəsrin Sotude İranda hüquq müdafiəçisi kimi fəaliyyət göstərir. O, edam təhlükəsi olan yetkinlik yaşına çatmayanların, hicab qadağasına əməl etmədikləri üçün həbs olunanların hüquqlarını müdafiə edib.
Nədə ittiham olunur: O, 2019-cu ildə“dövlət təhlükəsizliyinə qarşı çıxmaq” ittihamı ilə 38 il müddətinə azadlıqdan məhrum olunub.
Niyə aclıq aksiyası edir: Hüquq müdafiəçisi ona qarşı irəli sürülən ittihamların hüquq müdafiəçisi kimi fəaliyyəti ilə bağlı olduğunu düşünür və buna etiraz olaraq 40 gündür aclıq aksiyası keçirir.
