Rusiyanın müxalif siyasətçisi Aleksey Navalnının Moskvadakı mənzilinə həbs qoyulub. Siyasətçinin mətbuat katibi Kira Yarmışın yaydığı məlumatda deyilir ki, bu, Rusiya prezidenti Vladimir Putinin aşpazı Yevgeni Priqojinə məxsus olan “Moskva məktəblisi” şirkətinin iddiası ilə əlaqədardır.
Avqustun 27-də, Navalnının zəhərlənməsindən bir həftə sonra məhkəmə icraçıları Marinodakı mənzildə onun payına dair qeyd əməliyyatlarının qadağan olunduğunu elan ediblər. Bu, o deməkdir ki, Navalnı həmin mənzili sata, hədiyyə edə və ya girov qoya bilməz”
deyə K.Yarmış bildirib.
Mətbuat katibi siyasətçinin bank hesabına həbs qoyulduğunu da vurğulayıb.
Navalnı hazırda haradadır: Siyasətçi hazırda Almaniyadadır və o, müalicə aldığı “Charite” xəstəxanasından ötən gün evə buraxılıb.
Nə baş verib: A.Navalnı avqustun avqustun 20-də Sibirdən Moskvaya uçarkən halı pisləşib, təyyarə Omskda təcili eniş etməli olub. Müxalifətçi Omskdakı xəstəxanada iki gün qalandan sonra Almaniyaya aparılıb. Almaniya rəsmilərinə görə, Navalnı “”noviçok” sinfindən olan sinir qazı ilə zəhərlənib. Rusiya hakimiyyəti siyasətçinin zəhərləndiyi barədə iddiaları inkar edir.
